Пінок'ё

Музычная казка на дзве дзеі для ўсёй сям’і
Спектакль на беларускай мове

Пераклад i сцэнiчная рэдакцыя: Жана Лашкевіч
Рэжысёр-пастаноўшчык: Вiталь Баркоўскi
Мастак-пастаноўшчык: Дар'я Волкава
Балетмайстар: Анастасія Астапенка
Музычнае афармленне: Павел Захаранка

Ніколі ў казцы час не стаіць на месцы -- так праз сто гадоў Вялікі дуб з казкі пра драўлянага чалавечка Пінок’ё апынуўся амаль у цэнтры горада. А ў цэнтры горада -- свае правілы: не смеціць (жалудамі і лісцем), не шумець (галінамі -- нават калі вецер), не замінаць (напрыклад, ажыўленаму руху).

За сто гадоў на гісторыю пра драўлянага чалавечка Пінок’ё і ягонага бацьку Джэпета гараджане зусім забыліся. Затое Кот і Ліса па-махлярску пераканалі іх у тым, што горад -- толькі для людзей, таму трэба спілаваць Вялікі дуб, каб на ягоным месцы нешта пабудаваць – пажадана вялікі шматпавярховы забаўляльны цэнтр пад назвай "Краіна забаў".

Гэткія навіны вельмі непакояць і нават палохаюць Фею, гаспадыню казкі. Ёй на дапамогу спяшаецца сябра, знакаміты каралеўскі казачнік Малы Шэльма – ён самы Хітрун, Круцель і Гарэза (магчыма, вы з ім пазнаёміліся на спектаклі нашага тэатра "Кот у ботах"). Ён разумны, вясёлы, нічога не баіцца! І таму абавязкова што-небудзь прыдумае…